die folgenden Cartoons sind nur ein paar Beispiele aus dem eBook Alldag01 - Bloß id lugg lau

Alldag02 ist momentan in Bearbeitung. Die eBooks stehen demnächst komplett als .pdf zum kostenlosen Download bereit.

D Schwoba wend oft mit m Kopf durch d Wand.

Des hält sogar dr dickschde Schädl id emmr aus ond außerdeam duads moischdens au sakrisch weah.

Bilmes isch oiner von mehrare Nema fier da Schwobagrend.

Au Großkopfade hand an Bilmes!

Do muaß abr id emmr obedengt me denna sei!

Ond bei großkotzige Typa isch hendram Stirnknocha eh so hohl, dass koi Satz ohne Echo rauskommt.

Cartoon 1-01 Bilmes

Bißgurka ond Beißzanga send normalerweise bzw. moischdens alde, zänkische Weiber, dia da ganza Dag nix anders zom doa hand als en dr Gegend romzomkeifa ond goscha, goscha, goscha!

Boide goschad da liaba, langa Dag. Bloß guad, dass viele Alde koine Zeh meh en dr Gosch hand, dia kennad scho id beißa.

Abr goscha god halt au ohne Beißerla.

Cartoon 1-02 Bissgurk

Eisre Bulla diesseits ond au jenseits dr Iller send scho reachd. Abr außer a baar Schdrofzeddl - weaga Falschparka - vrdoila, hand se ja au id viel zom doa.

Guad, Dissa soll a Hotschpod fier Droga sei, said ma!

Abr des lauft alles em Donkla ab ond wer god scho en Illerdissa en dr Nacht gera schbaziera?

Eigendlich koiner, obwohl se en Dissa anscheinend id gar so schbarsam send wia dieba em gelba Land en Balza.

Do machad se nachts om Zwölfa odr Oins auf amol s Liacht aus, wehe do bisch mitm Rad ond ohne Liachd ondrweags. Do deff koi Randschdoi en dr Nähe sei, sonschd beigad des ganz ordentlich!

Cartoon 1-03 Bulla

Mit daggla moint man bei eis an dr Iller eigentlich laufa wie a Daggl (mit kuze Fiaß braucht man meh Dabbrla für da gleicha Weag wie oiner mit lange Fiaß, des weiß doch jeds Kend – id bloß en Schwoba!).

Wissa duads jeder, abr vrschdau donds bloß d Schwoba.

Ond hudla isch so ganz des Gegadoil. Hudla hoißd bressiera. Ond bressiera duads de wenigschde Schwoba. Des megad se id so arg. Do kommt ma au leicht ens Schwitza, gell?

Abr des kennad dia Preißa id so, odr?

Cartoon 1-04 Daggla

D Schwoba hand scho emmr an guada Droht noch oba ghed. Friehr hand se halt arg schreia miassa, heit zodag hat au dr liabe Herrgott a gscheids Handy!

Tja, bloß nawedds en d Höll glemmds WLAN a bisle, abr do sowieso faschd jedr Schwob en da Hemml ond id en d Höll kommt, schpielt des koi so a großa Roll.

Cartoon 1-05 Droht zom Herrgott

Der Schpitzaschport Eisschdockschiaßa wird id iebrall betrieba.

Konzentriera auf da Ponkt, domm drherschwätza, raucha, da Duschd id größr werra lau, de ganz Bah lockr-flockig rauf ond ra tänzla, mit deam schwera Schdock en dr Hand ond drbei no guad ausseah, des isch id jedem gea!

Jeda Woch perfekt auf „Schwarzeis“ trainiera, des isch zom Beischpiel en Kellmenz meglich.